सन्तोष कुमार रौनियार..
उदयपुरको चौदण्डीगढी नगरपालिका क्षेत्रका सामुदायिक बिद्यालय तथा क्याम्पसमा अध्ययनरत एक सय पाँच जना बिद्याथीलाई छात्रबृती प्रदान गरिएको छ । बेल्टार बजारस्थित नगरपालिकाको सभाहलमा नगर शिक्षा शाखाले आयोजना गरेको कार्यक्रममा उनीहरुलाई छात्रबृती रकम प्रदान गरिएको हो । बैंक खाता उपलब्ध गराएका बिद्यार्थीको बैंक खातामा तथा बैंक खाता उपलब्ध नगराएका बिद्यार्थीहरुलाई नगद नै छात्रबृती रकम प्रदान गरिएको छ । नगर शिक्षा शाखा प्रमुख उपसचिव रामेश्वर कुवँरले बिद्यालयका बिद्यार्थीहरुलाई ७ हजार र क्याम्पसमा अध्ययनरत बिद्यार्थीलाई जनही १२ हजार रुपैयाँ छात्रबृती रकम उपलब्ध गराएको जानकारी दिएका छन् । बिद्यालयतर्फ सिंहदेवी मावी माडिबास, मावी आमसाल बसहा, नारद आदर्श मावि बसहा, मावि सिवाई सिवाई, ज्योति मावी बेल्टार, जनता मावी हडिया, थानपोखरी मावी ज्यामिरेका ७२ जना र क्याम्पसतर्फ ज्योती जनता क्याम्पस सातधारे र नारद आदर्श शिक्षा क्याम्पस बसहाका ३३ जनागरी १०५ जनालाई छात्रबृती रकम प्रदान गरिएको उनले बताएका छन् । जेहेन्दार, विपन्न बिद्यार्थी छात्रबृती वितरण कार्यक्रम अन्तर्गत कक्षा ११ र १२ तथा क्याम्पसमा अध्ययनरत एकल महिला, दलित, मुश्लिम, लोपोन्मुख जनजाती, जेहेन्दार र विपन्न बर्गका बिद्यार्थीहरुको पहिचानगरी छात्रबृती प्रदान गरिएको कुवँरले बताएका छन् । नगर प्रमुख कालुमान लामा, वडा अध्यक्षहरु, शिक्षा शाखा प्रमुख कुवँर लगायतले बिद्यार्थीहरुलाई छात्रबृती वितरण गरेका थिए ।
कार्यक्रमलाई सम्बोधन गर्दै नगर प्रमुख लामाले आर्थिक अभावमा कोही पनि बालबालिका पठाईबाट बन्चित नहोउन भन्ने उदेश्यले नगरपालिकाले नीतिगत निर्णय गरेर गत बर्षदेखी नै जेहेन्दर र विपन्न बर्गका बिधार्थीहरुलाई छात्रबृती वितरण गरेको जानकारी दिएका थिए । उनले देशलाई समृद्ध बनाउनका लागि शैक्षिक ब्यक्ति निर्माणका लागि नगरपालिकाले लगानी गरेको हुनाले छात्रवृत्ति रकमको उच्चतम सदुपयोग गर्न आग्रह गरेका थिए । पढ्न चाहने विद्यार्थीहरुलाई सहयोग गर्न नगरपालिका सदैव तत्पर रहेको उल्लेख गर्दै नगर प्रमुख लामाले बिद्यालयदेखी स्नातक तहसम्मको पढाईमा नगरपालिकाले छात्रबृती दिएर पढाउने बताएका थिए । नगरको शैक्षिक समुन्नतीको निम्ति सबैलै आ आफ्नो क्षेत्रबाट साथ सहयोग गर्नुपर्ने लामाको धारणा थियो । कार्यक्रमलाई नगर प्रवक्ता प्रकाश राउत, चौदण्डीगढी नगर शिक्षक संगठनका अध्यक्ष द्रोण दाहालले समेत सम्बोधन गरेका थिए । कार्यक्रममा बिद्यालयलाई प्रबिधिमैत्री बनाउने उदेश्यले ५ वटा बिद्यालयलाई ल्यापटप पनि वितरण गरिएको थियो । गत बर्ष पनि नगर शिक्षा शाखाले ८६ जना बिद्यार्थीहरुलाई छात्रबृती रकम वितरण गरेको थियो ।